|
今日得閒，同你講故：所有生物，包括人、畜、魚，都帶有大量嘅細菌，而空氣、水中亦存在大量細菌，不停地尋找寄主，啱Key就一齊生活，唔啱Key就是彈一邊死，在經過不斷嘅進化，細菌就不斷變種，生物就不斷增強免疫系統。所有生物，都須要一個合適嘅生態環境去生活，如果環境有變，適應到，繼續生活，適應唔到，又死得。
講返魚，最基本嘅要求係水嘅咸淡度、酸鹼度、溫度、含氧量、含菌量(唔好意思，淨係夠料講到依度，有高手可以補充)
本來你D魚係你個缸度生活正常，同缸裡面D菌都互相適應晒，生態環境又冇問題；其他魚，不論係魚舖個缸、魚場個魚池、野生嘅河流溪澗，亦有佢哋嘅生態環境。
好嘞，你依家將第二度D魚搬嚟你個缸度住，理論上，就咁落缸都唔係死緊，不過想將依個風險減少，就要經過消毒同對水等步驟，做得越仔細，死嘅機會越少。
點樣隔離、消毒、對水，就睇吓你鬆唔鬆動(包括銀両及地方)、原來魚嘅數目同新返魚嘅數目、有冇心機。講兩個方法你參考，亦可參考舊文，各施各法。
方法一(唔鬆動、冇心機)：成袋魚放入缸中，因為D魚長途跋涉嚟到你屋企，又唔知乜環境，都驚咗好耐，魚受驚會降低免疫力，比D時間佢哋鎮靜翻，同埋對溫，半個鐘後袋有幾多水就用保鮮袋入返咁多魚缸水落去，再將魚連水倒入保鮮袋中，縛好放回缸中，半個鐘後再將魚缸水侵一陪落保鮮袋，卽係保鮮袋依家有一份跟魚嚟嘅水加三份魚缸水，半個鐘後可再對或撈魚入缸，保鮮袋嘅水一定唔要。
方法二(鬆動、有心機)：早一日用盤裝水喉水，落TDC、定水劑、氣泵、暖管、濾水器，成袋魚放入盤中，半個鐘後放魚，用毛巾舖面，唔駛佢見到你嚇餐死同埋以防D魚跳出嚟。以後每日用魚缸水換D盤中水，份量視乎你打算養幾多日先落缸。
依家應該知道消毒係唔想有菌入缸，影響缸中魚，對水係想新魚慢慢適應缸入面嘅水質，唔駛一下子變化太大而適應唔到。
再講魚嘅數目，如果新魚數量大，就要分批入缸，要知道菌係殺唔晒嘅，同埋一條魚適應咗一種菌唔等於第二條都適應，卽使同類嘅魚，主要視乎佢原來嘅環境，你將D魚放入缸中，部份菌會潛入水中，再揾新寄主，從而開枝散葉，如果一次過放入大量嘅魚入缸，咁就真係細菌戰，如果新魚強壯過舊魚，係有機會新魚唔死舊魚死，少量嘅菌，大家都可以接受，一多呢，就無論益菌定害菌都變成毒菌。所以缸同魚要有一定嘅比例。明未？(**以上資料，純粹個人意見，如有錯溜，請前輩高手指點，虛心候教**)
|
登入
註冊
問答集
